主席，今日嘅議題，講嘅係醫療融資改革，咁即係話：增加醫療保險覆蓋範圍，提高私營醫療機構收費透明度，甚至係提升醫療病歷制度，都係搔不着癢處。我認為改革醫療融資嘅KPI，一定係要幫到更多應該幫，應份幫嘅市民。論語話，「不患寡而患不均」，在政府2025-26年的開支預算中，醫療衞生係排首位，達到1,410億元，佔政府開支總額17.2%，所以我哋點睇，都唔可以話係「寡」！公營醫療經費主要係來自稅收，但係納得稅多都唔代表可以受惠得到，我所講的就係嗰班喺薪俸税納税人當中佔超過六成嘅中產人士。

你估佢哋唔想使用公營醫療服務咩？不過擸走超過七成醫療撥款嘅醫管局，收費係遠低於成本價，結果就引出佢無法滿足嘅服務需求。睇症難，輪候時間長，已經係眾所周知；造個電腦掃描或者磁力共振，需要等64和92個星期！呢班中產人士，如果唔想等得太耐，只好轉睇私家醫生。私家醫生輪候時間無疑係快啲，但收費就較昂貴，即使買了醫療保險，萬一遇上重病，「中產」就隨時會變「無產」。所以，我好贊成今日動議話要「善用資源」嗰部分，善用來自納稅人嘅公帑，去照顧每個階層嘅醫療需要，做到雨露均沾。

咁點先至做到雨露均沾？我嘅建議係喺現行長者醫療券的基礎上構建升級加強版，為全港每一位市民設立醫療户口，每名户口持有人每年可獲發放同一個指定金額作為資助，戶口結存唔只可以累積，一家人幾個戶口嘅款項仲可以共用，咁就可以加強能力去應付突如其來嘅醫療開支。

大家可能會問，咁會唔會使多好多公帑？答案係「唔會」，因為我無要求政府增撥資源，我只是建議政府巧妙咁重新分配現有嘅資源。現時醫管局以遠低於成本價提供醫療服務，做成求過於供，迫使不少中產人士轉向收費高昂的私營醫療機構。我的建議是經濟問題要用經濟手段去解決。政府將醫管局資源重新配置，為每位市民建立醫療户口，同時調整公營醫療收費，縮減同私家嘅價格距離，讓市民透過戶口嘅資助，選擇最啱自己嘅服務，這樣不單只能夠解決局長所講的公私營醫療失衡，仲可以更快達致全民醫療保障嘅目標。

主席，歸根到底，都係孔夫子歷久常新嘅智慧，「不患寡而患不均」，香港嘅稅務政策已經係能者多付，如果改革醫療融資都仲唔可以解決中產現時所面對嘅「不均」景況，咁佢哋唔只係能者多付，簡直就係付完再付！

主席，我呼籲政府秉承決策公平，善用資源的原則，全面推展醫療融資改革。