主席，自從2月26日財政司司長發表財政預算案，到今日不夠兩個月的時間，全球的政經局面已經出現了翻天覆地的變化。我哋正經歷緊一場史無前例的關稅戰，金管局雖然第一時間聯同銀行業加強了支持企業嘅措施，不過今次的關稅戰要打幾耐，大家都唔知，因此持久嘅支援係至關重要。我希望政府主動向商界找出痛點，促成銀行同企業達成雙贏嘅融資方案，大家係風雨同路，千祈唔好落雨收遮！
主席，最近發展局局長就北都嘅推展工作作出了多項公佈，給予社會各界對北都嘅發展更大信心和希望。我所代表嘅香港地產建設商會亦有就3 個「片區開發」試點向發展局提交了建議書。北都係香港未來發展嘅重要引擎，我們每一位持份者都希望可以貢獻我地一點點智慧，去協助北都更快開展。
發展局局長話會持開放嘅態度考慮各種支付地價嘅模式。 我知道，無論是按實補價、容許地價分期支付抑或以分紅方式付地價，都係業界經年所提出嘅，如今政府話願意考慮，業界是一定歡迎的。不過我認為仲可以多行一步！就係政府可以更具彈性、更務實的態度，去同業界商討換地同補價嘅申請。我希望政府能夠真正用好市場力量，咁樣，政府隨時可以慳翻一大筆收地賠償嘅補償金。
財爺在預算案中表示，會微調洪水橋廈村商業用土地嘅規劃，亦會延長申請換地的時限，政府回應市況而調節策略，係值得支持嘅，不過我認為仲可以多行一步！ 就係政府可以大刀闊斧在北都引入「白色規劃」，讓申請人有更多空間發揮創意、優化規劃，不但有更大自由度與未來在北都落戶嘅企業尋找合作機會，甚至可以為企業度身訂造一個動態有機的發展計劃，以迅速回應不斷變化的市場需要，配合北都科技產業長遠發展嘅要求。
剛在上星期，行會拍板北環線主線鐵路嘅推展計劃，為古洞同新田科技城交通基建踏出關鍵一步。交通基建固然重要，不過我認為仲可以多行一步！許多支援北都發展嘅基建設施，包括道路、供水、區域供冷系統都未到位，令我想起一句成語「水到渠成」。當發展商渠都起好喇，而政府供水依然未到，咁又點樣服務市民呢？因此，我建議政府在制定建築規約時可以採取更靈活的態度，在有需要時，以零補價去彈性延長建築規約，等發展商可以在基建到位時才將發展項目推出市場，以便更好服務將來落戶嘅產業同居民。
對於財爺話無論是公屋同私樓都已經預留足夠土地保障房屋供應，我雖然感到十分鼓舞，不過我認為仲可以多行一步！ 香港地產建設商會參與咗新田科技城規劃大綱圖嘅城規諮詢，提出咗好多重要嘅建議，有必要重新考慮公、私營房屋嘅比例，增加私樓供應，以迎合日後在科技城工作，包括本地同外來人才嘅年齡、家庭同住房需求，以免再一次出現供求失衡，有損市場穩定。
對於政府願意增撥資源，銳意與業界合作增強建造業人力培訓，又與內地單位合作，積極推動建築業優勢互補和品質技術的標準認證，我當然係無任歡迎，不過我認為仲可以多行一步！不論對北都片區，還是對全港的發展而言，降低建造成本已經係刻不容緩。為咗減省工程的成本，我建議政府要三管齊下。第一，要降低依賴外國進口建築物料和器材，加快與內地質量監管機構建立互認制度，認證符合香港質量標準的內地產品，並在基建設施工程上增加採用國家標準產品，利用國標產品質量可靠、價格相宜且供應穩定的優點，更好控制建築成本。第二，我促請當局清除建造業輸入勞工計劃中對私營工程設下的關卡，包括擴大計劃的涵蓋範圍，撤銷特定工種限制，容許輸入勞工跟隨承建商走，放寬住宿安排限制，以至放寬僱主必須支付不低於中位工資嘅規定。第三，在北都審批事項上不只要特事特辦，更應該成立一個高層次，跨政策局，擁有審批權，統籌工程和監督進度嘅辦公室，在發展項目上執行跨局跨部門協調工作，以縮短審批時間，確保負責官員迅速知悉並解決問題。若能做到三管齊下，我保証，政府的降低成本，提升競爭力嘅政策目標必可達成。
面對財政赤字的挑戰，財政司司長表明會以嚴格控制政府開支為主，開源為輔的原則，盡量減低對市民的影響，我雖然支持這項原則，不過為了香港嘅長遠利益，我認為仲可以多行一步！政府對住宅物業推行累進差餉制度，措施的實際效益有限，卻動搖了香港簡單稅制的「金漆招牌」。今日當有啲國家，為咗一己私利，不惜亂揮關稅大棒，損人害己，試問我哋又點能夠唔全力維護香港簡單稅制的美譽呢？我促請政府深入評估累進差餉制度實施後之市場反應及整體財政效益，在有需要時就唔怕去改弦易轍，一切都以香港長遠利益為依歸！
主席，我謹此陳辭，支持通過《2025年撥款條例草案》。
