主席，由去年到今年，行政長官在施政報告中不斷強調，要改革求變。「改革」這兩個字，特首上年提咗41次，今年就有10次，今年嘅主題是「深化改革、心繫民生、發揮優勢、同創未來」，第一段已開宗明義講，是香港實現突破新局面的策略部署。我仔細閲讀施政報告之後，發現關於北部都會區以及整體土地開發的政策和措施有七項突破。
第一項突破。特首時不時會領導一啲涉及特區整體政策和策略的委員會，但今次北都發展，佢唔只係做領隊，仲更加親自落場打前鋒，踢埋一份。施政報告提出特首成立並領導「北都發展委員會」，由三位司長/副司長分別領導工作組，取代督導委員會，提升決策層次，全面提速推展。施政報告發表咗不到兩星期，喺9月29日特首已經開咗首個工作會議，指示三個工作組務必盡快開工。
第二項突破是制度框架的突破。首先，政府會為北都訂立專屬法例，授予政府簡化法定程序，加快規劃研究，縮短行政步驟嘅利劍，這正是令北都發展提速、提效的關鍵一步。同時，財政司副司長領導嘅規劃及發展工作組，轄下會特設專案監督辦公室，為工程審批時限和分階段通報親自把關。這項安排，回應了我一直所建議的審批「單一窗口」，從此專責辦公室會一站處理簡化咗程序，參與北都發展嘅投資者和發展商再唔會被困於部門審批迷宮之中。
第三項突破是以土地政策，協助產業發展。當局會以更靈活的方式去處理產業用地嘅租期，提供最長續租合共21年的租約，協助租戶籌劃業務發展時可以將目光放得更遠。政府同時亦會研究成立園區公司，管理和營運產業用地，公司更會負責日常管理和招商引資等工作。
此外，為增加學生宿舍、簡化改劃手續而推出嘅「城中學舍計劃」會將措施範圍擴大，唔單只改裝現有商廈同酒店，拆卸商廈重建的全新學生宿舍，亦能應用計劃嘅利便措施，包括保留過剩地積比，當局今年內亦會預留至少三幅全新商業用地作興建新宿舍之用。我相信，呢啲措施唔只可以更有效使用商業用地和商廈，同時亦能盡快滿足學生宿舍的需求。
第四項突破是特首展現出促進者的氣魄，終於為城市發展拆牆鬆綁，接納業界經年提出的建議，放寬私人項目中停車場總樓面面積的豁免安排，並取消興建地庫停車場作為豁免的強制條件。這項德政，使建築工程更合乎環保原則，既能節省成本，亦可縮短施工期，更大大降低了住戶日後要承擔營運停車場的龐大開支。特首又提出為期三年的按實補價先導計劃，容許業主在修訂地契過程中分期發展，按實際樓面面積及用途補價。政策反映特首勇於從市場角度作考慮，為私人發展項目注入新契機，減輕早期資金壓力，增加市場投資意欲。我相信不單是北都，整個城市發展都會因此而受惠。
第五項突破是推動市區重建的新思維，包括三項新安排，放寬地積比政策，容許跨區轉移，喺急需重建嘅七個指定地區適度增加項目地積比，以及為市建局在北都預留三幅土地興建「樓換樓」單位。新措施更能善用土地資源，發揮舊區與新發展區互補發展嘅潛力同優勢。
踏入2025年，全港超過50年樓齡嘅樓宇已接近一萬幢，相反，重建強拍申請宗數就逐年下跌，2023年有5宗，2024年只得1宗，今年好翻啲，有3宗。對於釋放市區土地發展潛力，由去年到今年嘅致謝動議，我都促請政府盡快解除終審法院就Fully Profit 有關「房屋」嘅判決所做成嘅緊箍咒，以解放舊契物業的重建活動。雖然話香港要開創嘅係數碼經濟，但土地依然係科技嘅載體。如果話人係科技嘅主人，咁土地就係我哋嘅歸宿。特首嘅一個決策，是否去修訂地政總署編號 3/2000A 呢份作業備考，會決定呢啲舊契土地嘅發展潛力能否得到釋放抑或繼續冰封，都只係一念之間。
第六項突破是當局在原訂未來五年每年平均約為一千二百億元的基本工程開支，再額外預留300億元在未來兩至三年加大工程項目開支，並計劃特別投放在小型工程，以支持本地建造業尤其是協助建造業的中小企，我和業界都是肯定支持的。
第七項突破是特首表示政府會掌握土地供應主導權，既持續造地，亦確保有節有度及務實地部署推出土地的步伐。香港面對經濟轉型和複雜的地緣政局，政府能夠因時制宜調節土地供應，將有助樓市健康發展，鞏固市場信心。
我支持施政報告豐富置業階梯，協助公屋居民踏上置業第一級的目標，亦贊同施政報告按照《長遠房屋策略》，滿足私營房屋需求的政策，但係兩者之間如何首尾呼應，係值得深思。當置業人士一步一步攀上置業階梯，先發覺階梯因為公私營房屋比例係7／3比而越上越窄，又如何去應對僧多粥少嘅現實呢？
因此我認為若果特首仲有第八項嘅突破，就係突破固有框框，以土地供應主導權之利，調節公私營房屋嘅比例，為長遠房屋需求，為全港市民在置業階梯上走得更高更遠，作出超前部署，咁就更加完美嘞！
主席，4年以來我不斷重申，地產及建造界對國家，對香港，對社群的支持，都係義無反顧嘅。今年行政長官在施政報告中強調改革，我與我所代表嘅地產及建造界定當一如既往與政府攜手同行，為香港打造出更美好嘅明天。
