主席，我所期望的財政預算案，是能夠為香港廣大市民同我代表的地產建造界，創造處處機遇的經濟環境，讓我們克服挑戰，乘風破浪的預算案。
財政司司長在今年的預算案，清楚表明在2025至26年度會持續投入資源，增加基建工程開支以配合北部都會區和其他與經濟民生相關的工務工程，支持香港經濟持續發展。發展局亦都全力推動工務工程數碼化，提升工作效率、成本效益，以減低工程延誤及超支的風險。這些措施對地產建造界以至整個社會都有裨益。縱然仲可以有進步空間，但我認為都係值得支持嘅。
為咗應對龐大赤字，財爺在盡量減低對整體社會影響的前題下，在預算案中加大力度控制政府經營開支，強化財政整合計劃，正如財爺上週日嘅隨筆話，一切都只係為了逐步恢復公共財政平衡，而且有信心本周公布的第一季GDP預先估計數字，會有穩健表現。咁即使可能要承受一時間嘅痛楚，我相信市民都會理解和支持。
主席，財政司司長已經交出一份我認同，我應該可以支持嘅財政預算案，但係點解我仍然未得到我應該有嘅信心呢？
主席，地緣政治嘅變化，近日兩位我心目中德高望重嘅領袖先後離逝，以至關稅戰每日嘅推演，昨日不同今日嘅關稅措施，都令我更感到，一個高瞻遠矚嘅領袖，穩如磐石嘅政策，先至能夠令市民、令盟友有信心，同你一直風雨同路。香港之所以能夠傲視對手，就係我哋擁有得天獨厚嘅一國兩制，自由嘅營商環境，簡單低稅制，政府要恢復公共財政平衡，但係亦要堅守香港這三座橋頭堡。住宅物業累進差餉制度，直接動搖了香港簡單低稅制的「金漆招牌」，我相信唔只我同業界，好多市民亦不能認同。我促請政府改弦易轍，全力維護香港簡單低稅制，確保佢永遠係香港人信心所依嘅堅固磐石。
我支持通過《2025年撥款條例草案》，讓社會各界把握當前機遇，一齊克服挑戰，乘風破浪，攜手建設更美好的家園。
